ԽՈՐՀՈՒՐԴ ՔԱՐՏԱՊԱՆՆԵՐԻՆ

Թոքենիզացված քարտերով վճարում հնարավոր է կատարել բոլոր այն առևտրի/սպասարկման կետերում, որտեղ տեղադրված են առանց հպման սպասարկող POS-տերմինալներ։ Թոքենիզացված քարտով կատարված վճարումները հավասարազոր են ֆիզիկապես քարտով կատարված գործարքներին։

• Քարտապանը պատասխանատվություն է կրում իր կողմից թոքենիզացված քարտով կատարված վճարումների համար։
• Թոքենիզացված քարտով կատարված գործարքների բողոքարկման կարգը նույնն է, ինչ ֆիզիկապես քարտով կատարված գործարքների դեպքում։
• Բջջային հեռախոսը կորցնելու դեպքում Թոքենի բլոկավորման նպատակով անհրաժեշտ է անհապաղ կապ հաստատել Բանկի հետ։
• Եթե քարտը բլոկավորված է, ապա տվյալ քարտը հնարավոր չէ թոքենիզացնել:
• Քարտը բլոկավորելու դեպքում այդ քարտին կցված թոքեններով գործարք հնարավոր չէ իրականացնել:
• Քարտապանի կողմից թոքենի բլոկավորման դեպքում քարտը չի բլոկավորվում:

Ծանոթացեք քարտերի թոքենիզացման պայմանների մանրամասներին:

Քարտերի առաքման ծառայությունը գործում է նոր պատվիրված, փոխարինված և վերաթողարկված քարտերի համար ՀՀ ողջ տարածքում՝ անվճար: Քարտը հաճախորդին առաքվում է Երևան քաղաքի տարածքում 1-5 աշխատանքային օրերի ընթացքում, իսկ ՀՀ մարզերում՝ 2-7 աշխատանքային օրերի ընթացքում:

Քարտի առաքման ծառայությունից օգտվելու անհրաժեշտ պայմաններ՝

• Քարտը պատվիրվել է «Պին» կոդը SMS հաղորդագրության միջոցով ստանալու տարբերակով,
• Քարտը հաճախորդին հանձնվում է անձը հաստատող փաստաթղթի առկայության դեպքում։

Առաքման ծառայությունը չի գործում՝

• Այն քարտերի համար, որոնց դեպքում դիմողը չի հանդիսանում Բանկի հաճախորդ կամ հաճախորդի տվյալները Բանկում թարմացված չեն,
• Վարկային գծով այն քարտերի համար, որոնց դեպքում քարտային հաշվի վարկային գծի պայմանագիրը մինչ քարտի առաքման պահը ստորագրված չէ:

• Քարտը ստանալուց հետո ստորագրեք քարտի ետնամասում ստորագրության համար նախատեսված հատուկ դաշտում
• Մտապահեք Պին կոդը և ոչնչացրեք Պին կոդը պարունակող ստացականը (եթե առկա է Պին կոդի ծրար), , խուսափեք Պին կոդը քարտի հետ միասին պահելուց
• Խուսափեք Պին կոդը քարտի վրա, հեռախոսի կամ համակարգչի մեջ գրելուց և երրորդ անձանց համար հասանելի այլ վայրում պահելուց, քարտը և Պին կոդը մի տրամադրեք ցանկացած այլ անձանց,
• Ապահով պահեք Ձեր քարտային տվյալները և մի ուղարկեք դրանք այլ անձանց SMS հաղորդագրության, էլեկտրոնային նամակի կամ ցանկացած այլ եղանակով, ինչպես նաև մի տեղադրեք նկար կամ այլ նյութ սոցիալական ցանցերում, որը կարող է պարունակել քարտի վերաբերյալ տեղեկատվություն, մասնավորապես՝
• Քարտի համար
• Քարտի PIN կոդ
• Բանկային գաղտնաբառ
• Քարտի դիմերեսին կամ դարձերեսին գրված եռանիշ կամ քառանիշ թվերը CVV/CVC
• Քարտի վրա նշված վավերականության ժամկետ
• SMS հաղորդագրության միջոցով Բանկում գրանցված հեռախոսահամարին ուղարկվող մեկանգամյա օգտագործման (3D SECURE) գաղտնաբառ
• Էլեկտրոնային նամակի միջոցով Բանկում գրանցված էլեկտրոնային փոստի հասցեին ուղարկվող մեկանգամյա օգտագործման (3D SECURE) գաղտնաբառ

• Բանկոմատով գործարք կատարելիս վստահ եղեք, որ Ձեզ ոչ ոք չի հետևում: Օգտվ՛եք միայն Ձեզ հայտնի բանկերի բանկոմատներից, հնարավորինս խուսափեք հեռու և ամայի վայրերում տեղադրված բանկոմատներից:
• Մի օգտվեք այն բանկոմատից կամ POS տերմինալից, որի քարտը ընթերցող սարքին, ստեղնաշարին կամ կանխիկի տրամադրման պատուհանին միացված են լրացուցիչ սարքավորումներ և/կամ առկա է տեսանկարահանող հավելյալ սարք: Կասկածի դեպքում խնդրում ենք դիմել Բանկի շուրջօրյա սպասարկման կենտրոն (+374 10) 31 99 99 կամ (+374 10) 31 88 99 հեռախոսահամարներով:
• Բանկոմատում գործարք կատարելուց հետո մի մոռացեք վերցնել Ձեր քարտը: Անվտանգության նկատառումներից ելնելով՝ բանկոմատը 30 վայրկյան հետո կառգրավի այն:
• Բանկոմատից օգտվելիս կամ POS տերմինալներով վճարումներ կատարելիս PIN կոդը մուտքագրելու ժամանակ ձեռքով ծածկեք այն՝ այլ անձանցից կամ անօրինական նկարահանող սարքերի կողմից այն պաշտպանելու համար:
• Ստուգե՛ք, արդյոք բանկոմատը ճիշտ է տրամադրել Ձեր նշած գումարը: Խնդիրների դեպքում անհապաղ զանգահարե՛ք Բանկի շուրջօրյա սպասարկման կենտրոն (+374 10) 31 99 99 կամ (+374 10) 31 88 99 հեռախոսահամարներով:
• Քարտի կորստի կամ քարտից գումարի անօրինական օգտագործման կասկածի դեպքում անհապաղ զանգահարե'ք Բանկի շուրջօրյա սպասարկման կենտրոն (+374 10) 31 99 99 կամ (+374 10) 31 88 99 հեռախոսահամարներով:

• Զեղծարար կայքերում բրենդային, թանկարժեք ապրանքները սովորաբար ներկայացված են լինում անհամեմատ ցածր գներով, քան այդ ապրանքների պաշտոնական արժեքներն են:
• Սովորաբար այցելուներին գրավելու նպատակով օգտագործվում են մեծ զեղչեր (80-90%) կամ դրանց շատ փոքր վերջնաժամկետներ (օրինակ՝ զեղչի ավարտին մնացել է 30 րոպե): Հաճախ զեղծարար կայքերում կարող է օգտագործվել նաև զեղչի ավարտը նշող վայրկյանաչափ, որը զրոյանում է կայքը թարմացնելուց հետո:
• Զեղծարար կայքերը օգտագործում են էժան, կոնտեքստային գովազդ՝ հաճախ կասկածելի գրառումներով (այսինքն` հաճախորդը զեղծարար կայք է մտնում այլ կայքում տեղադրված գովազդային հղումով):
• Զեղծարար կայքերի դիզայնը, սովորաբար, էժանագին տեսք ունի, հաճախ մի քանի կայքերի դիզայնները կրկնվում են: Բացակայում են իրավաբանական անձի մասին տվյալները, չկան հասցեներ կամ հեռախոսահամարներ, կամ դրանք իրական չեն:
• Տարբերակիչ կարող է հանդիսանալ նաև որևէ սոցիալական կայքում էջ չունենալու հանգամանքը:
• Զեղծարար կայքերը որոնողական համակարգերում (Google, Yandex, Bing) մուտքագրելիս, որպես կանոն, առաջին էջում հայտնվում է տեղեկատվություն տվյալ կայքի զեղծարար (Fraudulent) լինելու մասին ազդակ (Fraud Alert):
• Զեղծարար կայքերի վերաբերյալ գովազդներ հաճախ տեղադրված են լինում սոցիալական կայքերում, օր.՝ Facebook, Instagram, ինչը հաճախ հավատ է ներշնչում զեղծարար կայքից գնում կատարելու համար: Նման կայքերի ակտիվացման մեծ տենդենց նկատվում է «Սև ուրբաթ» (Black Friday) կոչված օրերին, քանի որ մարդկանց համար այն հայտնի է որպես մեծ զեղչերի օր:
• Ուշադիր ստուգեք կայքի հասցեն, արդյոք այն ճիշտ է մուտքագրված: Զեղծարար կայքերի հասցեները սովորաբար աննշան տարբերվում են իսկական կայքերի հասցեներից (օր.՝ www.gogle.com այլ ոչ www.google.com):

Հաշվի առնելով վերոնշյալը՝ հորդորում ենք քարտով ցանկացած ինտերնետային գնում կատարելիս լինել շատ ուշադիր:

Բանկի կողմից թողարկվող քարտերով կարող են իրականացվել ինչպես կանխիկ, այնպես էլ` անկանխիկ գործառնություններ:

• ՊՈՍ տերմինալի միջոցով վճարում,
• քարտի տվյալների ներկայացմամբ վճարում,
• ինտերնետի միջոցով ապրանքների, ծառայությունների և աշխատանքների համար վճարում,
• կանխիկ միջոցների ստացում բանկոմատներից և կանխիկի տրամադրման կետերից,
• բանկոմատների միջոցով կանխիկ գումարի մուտքագրում քարտին,
• բանկոմատի միջոցով քարտից քարտ փոխանցում կամ վճարում,
• օրենքով և Բանկի ներքին իրավական ակտերով չարգելված այլ գործառնություններ:

• Գործառնություն հնարավոր է իրականացնել միայն այն առևտրի ու սպասարկման կետերում կամ այն բանկոմատների միջոցով, որտեղ փակցված է տվյալ քարտային համակարգի լոգոտիպը:
• Քարտային հաշվին մուտքագրված դրամական միջոցները կարող են օգտագործվել ամենաուշը սկսած հաջորդ բանկային օրվա ժամը 18:00-ից:
• Եթե գործառնության կատարման համար Բանկից չի պահանջվել հավաստագրում (գործառնության կատարման իրավասության ստուգում), և գործառնության գումարը գերազանցել է հաշվի մնացորդը կամ քարտով կատարված գործառնության դիմաց գանձման ենթակա միջնորդավճարի գումարը գերազանցել է հաշվի մնացորդը, և մի քանի այլ դեպքերում կարող է առաջանալ քարտային հաշվի գերածախս, որի նկատմամբ Բանկը հաշվարկում է վարկային գծի օգտագործման համար նախատեսված տոկոսագումարներ` համաձայն Բանկի սակագների:
• Վճարում կատարելիս, մինչև անդորրագիրը ստորագրելը, անհրաժեշտ է հավաստիանալ, որ անդորրագրում նշված գումարը համապատասխանում է Ձեր գործարքի գումարին:
• Քարտով կատարված գործարքների անդորրագրերը խորհուրդ է տրվում պահպանել գործարքի կատարման օրվանից հետո առնվազն երեք ամիս:
• Քարտով վճարում կատարելիս անհրաժեշտ է քարտը միշտ պահել տեսադաշտում:
• Եթե հրաժարվում եք գնումից, ապա պահանջեք չեղյալ համարել (VOID) Ձեր վճարումը և պահեք գործարքի չեղյալ համարելու անդորրագիրը մինչև հերթական քաղվածքի ստացումը, որպեսզի համոզվեք, որ գումարը քաղվածքում չի երևում և չի գանձվել:
• Բանկը սահմանափակում է քարտով մեկ օրվա ընթացքում կանխիկի ստացման գործառնությունների քանակը և առավելագույն գումարը, մեկ օրվա ընթացքում վճարային գործառնությունների առավելագույն գումարը, և այդ սահմանչափերի գերազանցումը կարող է գործարքի մերժման պատճառ հանդիսանալ: Սահմանաչափերը կարող են փոփոխվել Բանկի ներքին իրավական ակտերով սահմանված չափով քարտապանի կողմից Բանկին դիմելու դեպքում:

Ինտերնետային առևտուրը հնարավորություն է տալիս հարմարավետ գնումներ կատարել տարատեսակ ապրանքների լայն տեսականի ունեցող ինտերնետային խանութներից, որոնք հաճախ առաջարկում են ավելի մատչելի գներ, քան սովորական խանութները: Բացի այդ, որոշակի ծառայություններից օգտվելու համար ուղղակի չի առաջարկվում այլ վճարամիջոց, քան վճարային քարտն է:

1. Օգտվե´ք միայն այն կայքերից, որոնց հասցեները սկսվում են "https" հապավումով կամ ունեն "Secure Sockets Layer (SSL)" կրիպտոգրաֆիկ արարողակարգ,
2. ապահովե´ք Ձեր կողմից սահմանված գաղնտաբառերի գաղտնիությունը,
3. ապահովե´ք Ձեր քարտի տվյալների գաղտնիությունը,
4. Ձեր վճարային քարտի տվյալները լրացրեք ինտերնետային կայքերում միայն գնում կատարելու ժամանակ և ոչ մի դեպքում` որևէ այլ նպատակով,
5. մի՛ անտեսեք ինտերնետային խանութի "Terms and conditions" (Պայմաններ) էջը,
6. մինչև վճարում կատարելը ուշադրությամբ ընթերցեք տվյալ ինտերնետային խանութի առաքման և ապրանքների վերադարձման պայմանները: Ստուգեք, թե ով է վճարելու ապրանքների առաքման համար և համոզվեք արդյոք ձեռք բերվող ապրանքները ենթակա են վերադարձման ինչ-որ պայմանների դեպքում (օրինակ խոտանի կամ սխալ ապրանքի առաքման դեպքում): Ստուգե´ք` արդյոք տվյալ ինտերնետային խանութը իրակացնում է ապրանքների առաքում դեպի Հայաստան, թե ոչ,
7. ստուգե´ք, թե արդյոք տվյալ ինտերնետային խանութում հնարավոր է կատարել վճարում Հայաստանում թողարկված քարտերով,
8. 3D Secure տեխնոլոգիայով սպասարկվող կայքերը հնարավորություն են տալիս անթերի իդենտիֆիկացնել քարտապանին "Verified By Visa" տարբերանշանները կրող կայքերում ինտերնետային վճարումներ իրականացնելիս, քանի որ յուրաքանչյուր իրականացվող վճարում պետք է հաստատվի մեկանգամյա կոդով, որը քարտապանին ուղարկվում է SMS հաղորդագրության միջոցով այն բջջային հեռախոսահամարին, որը նա գրանցել է Բանկում: Միայն ճիշտ կոդի մուտքագրման պարագայում հնարավոր կլինի հաստատել քարտով իրականացվող գործարքը: Նման մեթոդով քարտով զեղծարարությունների իրականացումը գործնականում դառնում է անհնար:

• Բանկի ցանկացած մասնաճյուղում*,
• ACBA ON-LINE և ACBA Mobile ծառայությունների միջոցով,
• Բանկոմատների միջոցով կանխիկ դրամի մուտքագրման ծառայության միջոցով,
• Կանխիկի ընդունման տերմինալներով և Բանկային ավտոմատացված մեքենաների միջոցով կանխիկ դրամի մուտքագրման ծառայության միջոցով
• Ցանկացած այլ բանկից փոխանցում կատարելու միջոցով:

_{*բացառությամբ 500 եվրո անվանական արժեքով թղթադրամների}

Փոխանցումների կատարման համար բավական է փոխանցող կողմին հայտնել քարտի ստացման ժամանակ Ձեզ տրամադրված «Քարտի և քարտային հաշվի տվյալները, քարտի սպասարկման սակագները» փաստաթղթում նշված տեղեկատվությունը:

Բանկային փոխանցումով ստացված գումարը կփոխանցվի Ձեր քարտային հաշվին քարտի արժույթով:

Վճարային քարտերը ոչ միայն հարմար, այլ նաև ապահով գործիք են ուղևորության ընթացքում Ձեր դրամական միջոցների անվտանգության համար: Ի տարբերություն կանխիկ դրամական միջոցների, քարտի կորուստը դեռևս չի նշանակում գումարի կորուստ, քանի որ Դուք կարող եք Ձեր քարտը բլոկավորել ընդամենը մեկ հեռախոսազանգով և փոխարինել այն շատ արագ:

Պարզապես չմոռանաք հետևել մեր խորհուրդներին.

1. Նախքան մեկնելը`

• Ստուգեք քարտի գործողության ժամկետի ավարտը (expiry date),
• Համոզվեք, որ Դուք ունեք բավարար միջոցներ Ձեր հաշվին,
• Հիշեք, որ սահմանված է քարտով մեկ վճարման առավելագույն գումարի սահմանաչափ, օրական կանխիկի ստացման առավելագույն գումարի սահմանաչափ և օրական կանխիկի ստացման առավելագույն քանակ,
• Նշված սահմանաչափերի գերազանցման հետևանքով գործարքի մերժումից խուսափելու նպատակով նախապես ավելացրեք դրանք, եթե սահմանված չափերը չեն բավարարում Ձեզ,
• Գրի առեք Ձեր քարտի 16-նիշանոց համարը և բոլոր այն հեռախոսահամարները (ներկայացված են ստորև), որոնցով կարող եք զանգահարել` արտերկրում Ձեր քարտի կորստի կամ գողության դեպքում:

2. Ուղևորության ընթացքում`

• Բանկոմատից օգտվելուց առաջ հավաստիացեք, որ Ձեր քարտի տվյալները տեսանելի չեն մոտակայքում գտնվող մարդկանց,
• Բանկոմատում քարտի առգրավման դեպքում փորձեք դիմել այն բանկին, որին պատկանում է տվյալ բանկոմատը: Եթե անձը հաստատող փաստաթղթի ներկայացմամբ բանկը հրաժարվում է վերադարձնել քարտը, ապա զանգահարեք Ակբա բանկ, որը կհոգա քարտը Ձեզ վերադարձնելու մասին,
• Քարտով վճարում կատարելիս մինչև անդորրագրի ստորագրելը, հավաստիացեք, որ անդորրագրում նշված գումարը համապատասխանում է Ձեր գործարքի գումարին,
• Պահպանեք քարտով կատարված գործարքների անդորրագրերը և վերադառնալուց հետո համեմատեք դրանք Ձեր քաղվածքում ներկայացված գործարքների հետ:

Քարտի կորստի կամ գողության դեպքում անհրաժեշտ է անմիջապես զանգահարել (010) 31 88 99 կամ (010) 59 22 22 շուրջօրյա սպասարկման հեռախոսահամարներով և հայտնել քարտի կորստի մասին: Զանգից անմիջապես հետո քարտը կբլոկավորվի:

Քարտի կորստի մասին Բանկին տեղեկացնելու հետաձգումը կարող է հանգեցնել քարտով այլ անձանց կողմից գործարքների կատարմանը:

Քարտապանը պատասխանատվություն է կրում քարտով կատարված գործառնությունների համար մինչև այն պահը, երբ տեղեկացնում է Բանկին քարտի կորստի կամ գողության պատճառով քարտի գործողությունը դադարեցնելու անհրաժեշտության մասին:

Քարտի փոխարինման կամ փակման համար Քարտը բլոկավորելուց հետո 7 (յոթ) օրացուցային օրվա ընթացքում դիմել Բանկին:

Քարտի/acba digital համակարգի բլոկավորման նպատակով կարող եք ներկայացնել զանգի պատվեր։

• ԱՐԱԳ

Առանց կոնտակտի տեխնոլոգիայով վճարում կատարելը կտևի ընդամենը մի քանի վայրկյան:

• ՀԵՇՏ

Կարիք չկա քարտը փոխանցել սպասարկողին, մտցնել այն տերմինալի մեջ, ստորագրել անդորրագիրը, իսկ մինչև 20,000 ՀՀ դրամ վճարումների դեպքում, նաև՝ մուտքագրել Ձեր PIN կոդը:

• ԱՆՎՏԱՆԳ

Առանց կոնտակտի տեխնոլոգիայով վճարումները օժտված են զեղծարարություններից պաշտպանության հուսալի համակարգով, իսկ որպես լրացուցիչ անվտանգության միջոց, 20,000 ՀՀ դրամը գերազանցող վճարումների դեպքում անհրաժեշտ է մուտքագրել քարտի PIN կոդը: Միևնույն ժամանակ առանց կոնտակտի տեխնոլոգիայով օժտված քարտերը կարող են կիրառվել քարտի չիպի և մագնիսական ժապավենի օգտագործմամբ գործարքներ կատարելու համար՝ ինչպես նախկինում: