Հայաստանում կազմակերպված ֆինանսական տեխնոլոգիաների համաժողովի՝ FinnoWay Armenia-ի շրջանակում ֆինանսական կառույցների, տեխնոլոգիական ընկերությունների և կարգավորող մարմինների ներկայացուցիչները քննարկել են հարկային վարչարարության թվայնացման և բիզնես գործընթացների թափանցիկության կարևորությունը։
Ակբա բանկի թվային պլատֆորմների և տեխնոլոգիաների տնօրեն Տիգրան Սիմոնյանը համաժողովի ընթացքում կազմակերպված պանելային քննարկմանը խոսել է հանրային ծառայությունների թվայնացման գործընթացում Ակբա բանկի ակտիվ մասնակցության մասին։
«Մենք ստեղծում ենք թվային կամուրջ՝ մասնավոր և պետական հատվածների միջև։ Կառուցում ենք համակարգ, որտեղ հաջողում է թե՛ պետությունը, թե՛ մասնավոր հատվածը և թե՛ քաղաքացին։ Շատ կարևոր է պետության այն տեսլականը, որ ինչ-որ կետում հանրային բոլոր ծառայությունները պետք է թվայնացվեն։ Որպես բանկ, դա մեզ հնարավորություն կտա մեր հաճախորդներին մատուցել հավելյալ արժեք ունեցող ծառայություններ` ինտեգրելով նաև պետական ծառայությունները մեկ անվտանգ ու վստահելի պլատֆորմում»,- նշել է Ակբա բանկի թվային պլատֆորմների և տեխնոլոգիաների տնօրեն, գլխավոր գործադիր տնօրենի տեղակալ Տիգրան Սիմոնյանը։
