Ի՞նչ է ներդրումային ստրատեգիան։

Ներդրումային ռազմավարությունը Ձեր գործողությունների հստակ պլանն է բորսայում։ Այն պետք է հստակ արտահայտի գումարի ներդրման նպատակներն ու ժամանակահատվածը, գործարքների հաճախականությունը և եկամտի ակնկալիքները։

Մենք սովորաբար բավականաչափ ժամանակ ենք ծախսում մեր աշխատանքային օրը, արձակուրդը կամ մեքենայի գնումը պլանավորման վրա, բայց հաճախ մոռանում ենք ամենակարևոր պլանը՝ խնայելու, ներդրումներ կատարելու և մեր բարեկեցին ապագան ապահովելու պլանի մասին:

Առանց ներդրումային ռազմավարության ներդումները նման են ֆուտբոլային թիմի, որը չունի խաղային պլան: Թեև ներդրումային ռազմավարություն ունենալը պարտադիր չէ, սակայն այն զգալիորեն մեծացնում է ձեր հաղթելու հնարավորությունը:

Ներդրումային ռազմավարության ստեղծումը պետք է լինի ձեր 2-րդ քայլը՝ ֆոնդային շուկայում ներդրումներ կատարելու որոշ հիմունքներ սերտելուց հետո։

Ռազմավարությունը կօգնի կազմել կշռադատված ներդրումային պորտֆել, խուսափել չմտածված որոշումներից, հետևաբար նվազեցնել կորուստների ռիսկերը։ Մշտապես անհրաժեշտ է հետևել հստակ պլանի և ժամանակ առ ժամանակ վերանայել այն՝ ըստ շուկայի փոփոխությունների։

1․ Հստակեցրեք նպատակը

Առաջին հերթին ինքներդ Ձեզ հարցեր տվեք՝ հստակեցնելու ներդրման առանցքային նպատակները։ Վերջիններս կարող են լինել բազմազան՝ գնել մեքենա, վճարել երեխաների ուսման համար կամ ապահովել անհոգ ծերություն։

2․ Սահմանեք ժամկետներ

Ժամկետները ուղղակիորեն կապված են Ձեր ներդրումային նպատակների հետ։ Ըստ ժամկետների ռազմավարությունները լինում են․

• Երկարաժամկետ —ներդրումների վերադարձ ոչ շուտ, քան 3 տարի անց,
• Միջնաժամկետ— պատրաստ եք ներդրումների հետվերադարձին սպասել 1-3 տարի,
• Կարճաժամկետ — նախատեսում եք գումարը ետ ստանալ 1 տարուց շուտ, կամ այն կարող է անհրաժեշտ լինել ցանկացած պահի։

Երկարաժամկետ ստրատեգիան թույլ է տալիս ընտրել ռիսկի տարբեր մակարդակներ և եկամտաբերության գրեթե ցանկացած գործիք։

Միջնաժամկետ ստրատեգիայի դեպքում գործիքների ընտրությունը ավելի քիչ է։ Կարող եք ընտրել ակտիվներ, որոնց գները, չնայած տատանվում են, սակայն 1-3 տարվա հեռանկարում եկամտաբերություն են ապահովում։

Միջնաժամկետ և երկարաժամկետ ստրատեգիայի դեպքում անհրաժեշտություն չկա մշտապես հետևել շուկայի տատանումներին․ պարզապես պետք է հետևել շուկայի ընդհանուր իրավիճակին և պարբերաբար թարմացնել սեփական պորտֆելը։

Եթե կապիտալը մոտակա ժամանակներում կարող է պետք գալ, ընտրեք կարճաժամկետ ստրատեգիան։ Ձեզ հարմար կլինեն միայն իրացվելի ակտիվները, որոնք հնարավոր է վաճառել ցանկացած պահի։ Օրինակ՝ ազատ վաճառվող բաժնետոմսեր բորսայում և այլն։ Կարճաժամկետ ներդրումների եկամտաբերությունը ավելի շատ կախված է Ձեր ակտիվների ժամանակավոր տատանումներից։ Եթե նպատակ ունեք արագ շահույթ ստանալ, ապա պետք է պատրաստ լինեք նաև լուրջ կորուստների։

3․ Գնահատեքներդրումներին հատկացվող ժամանակը

Եթե պատրաստ չեք մշտապես հետևել ֆինանսական շուկայի փոփոխություններին, կարդալ նորություններ և ուսումնասիրել ընկերությունների հաշվետվությունները, ապա ընտրեք պասիվ ստրատեգիան, որը հարմար է երկարաժամկետ ու միջնաժամկետ ներդրումների դեպքում։

Այս դեպքում անհրաժեշտ չէ վերլուծել ընթացիկ իրավիճակը, սակայն պետք չէ մոռանալ ներդրումների մասին, քանի որ ցանկացած ներդրում վերահսկողության կարիք ունի։ Ժամանակ առ ժամանակ գնահատեք Ձեր ակտիվները և դրանց ռիսկերը։

Այն ներդրողները, որոնք պատրաստ են արագ արձագանքել նորություններին և ամեն օր առևտուր անել, նախընտրում են ակտիվ ստրատեգիան, որը հնարավորություն է տալիս ստանալ մեծ եկամուտ, սակայն կապված է ավելի մեծ ռիսկերի հետ։

4․ Որոշեք, թե ինչ ռիսկերի եք պատրաստ

Ներդրումային ռիսկերը՝ ըստ մակարդակների լինում են պահպանողական, չափավոր և բարձրռիսկային։ Սովորաբար որքան շատ է ներդրման պոտենցիալ վերադարձը, այնքան մեծ է ամեն ինչ կորցնելու ռիսկը։

Պահպանողական ստրատեգիան համապատասխանում է նրանց, ովքեր չեն ցանկանում իրենց կապիտալը վտանգի ենթարկել։ Նմանատիպ ներդրումներից մեծ եկամուտ ակնկալել պետք չէ, սակայն կարող են եկամուտ բերել ավելի շատ, քան բանկային ավանդի տոկոսները։ Միաժամանակ՝ կորուստների հավանականությունն այդքան էլ մեծ չէ։

Իսկ եթե Դուք ցանկանում եք ունենալ առավելագույն եկամուտ և միևնույն ժամանակ ընդունում եք ներդրումների որոշ մասի հավանական կորուստը, ապա կարող եք ընտրել բարձրռիսկային կամ ագրեսիվ ստրատեգիան։ Այս տեսակը հիմնականում ընտրում են նրանք, ովքեր ունեն ժամանակ և էներգիա, և կորցնելու դեպքում կարող են արագ վերականգնել ներդրումները։

Ամեն դեպքում, ներդրողների մեծամասնությունն ընտրում է չափավոր ստրատեգիան։ Այն առաջարկում է ընտրել ֆինանսական գործիքներ՝ ըստ ռիսկի մակարդակի։ Օրինակ՝ գումարի մեկ երրորդը կարելի է ներդնել ամենահուսալի պարտատոմսերում՝ պետության և խոշորագույն ընկերությունների մեջ, ինչպես նաև՝ թանկարժեք մետաղներում։

Առաջին հերթին անհրաժեշտ է մանրակրկիտ ուսումնասիրել բորսայի և տարբեր ֆինանսական գործիքների առանձնահատկությունները։ Եթե դրանից հետո ինքնուրույն պատրաստ չեք ներդրումներ անել, ապա ընտրեք բրոքեր և սկսեք ներդրումներ կատարել նրա աջակցությամբ։

Ամեն դեպքում, եթե դժվարանում եք կողմնորոշվել բորսայում, կարող եք դիմել ներդրումային խորհրդատուի աջակցությանը։ Նա կուղորդի կազմել առաջնային պորտֆել, այնուհետև, ըստ անհրաժեշտության, կօգնի այն փոփոխությունների ենթարկել։